பிலிப்பைன்சில் நிலநடுக்கம்: ரிக்டர் அளவுகோலில் 5.3 ஆக பதிவானது

மணிலா, பிப். 17-

வடக்கு பிலிப்பைன்சில் 5.3 ரிக்டர் அளவு கொண்ட பூகம்பம் ஏற்பட்டது. இதனால் ஏற்பட்ட சேத விவரங்கள் குறித்து உடனடியாக எந்த விவரமும் வெளியாகவில்லை.

அந்நாட்டின் தலைமை நில அதிர்வு நிபுணரான ரெனட்டோ சொலிடம் இது குறித்து கூறுகையில், நாட்டின் முக்கிய தீவான லுசானின் வடக்கு கடற்கரை பகுதியில் இப்பூகம்பம் மையம் கொண்டிருந்தது என்றார். இதனால் சுனாமி ஏற்படுவதற்கான அறிகுறி எதுவும் தென்படவில்லை என்றும் அவர் கூறினார்.

அந்நாட்டில் கடந்த அக்டோபர் 15ந் தேதி நிகழ்ந்த 7.1 ரிக்டர் அளவுள்ள பூகம்பத்தால் 200 பேர் பலியானதுடன், சர்ச்சுகள், பள்ளிகள் மற்றும் மருத்துவமனைகள் சேதமடைந்தது குறிப்பிடத்தக்கது. எரிமலைகளின் தாக்கத்தால் உருவான தீவுப்பகுதியான பிலிப்பைன்ஸ், பசிபிக் பெருங்கடலின் நெருப்பு வளையமாக காணப்படுவதுடன் அடிக்கடி நிலநடுக்கம் ஏற்படும் பகுதியாகவும் அறியப்படுகிறது.